Rahui Papa

I tipu ake a Rahui i runga i toona marae, i toona papakaainga hoki, i Poohara. He kaiako, he kaipaapaaho, he kaiwhakawaa kapa haka, he puukoorero hoki. He maatanga ia moo te reo o Waikato, moo ngaa tikanga me ngaa koorero tuku iho aa-iwi hoki. Kua tuu a Rahui hei kanohi moo toona marae i te paaremata aa-iwi o Waikato-Tainui, mai i toona tiimatanga i te tau 1999. I tohua ia hei Heamana moo Te Arataura (te poari whakahaere aa-iwi) i te tau 2013.

He mema whakahirahira hoki ia o te Iwi Leaders Group moo ngaa kaupapa e paa ana ki te wai maaori, ki te Whaanau Ora, ki te Manatika. Naana hoki te Iwi Leaders Group i aarahi moo te kaupapa o Te Pire Reo Maaori. Kua noho ia hei kaiwhakahaere, hei kaitiaki hoki i ngaa poari huhua peenei i te Tainui Waka Cultural Trust, i te Tainui Group Holdings, i te koohanga reo me ngaa tarahati whenua, ngaa tarahati whakataunga hoki. Kua maarena a Rahui raaua ko Mariana, aa, tokoono aa raaua tamariki.

Ko taa te rangatira, he mahi i te mahi, ko teetahi o ngaa kupu whakamaarama a te Kaahui Ariki, a Tuumate Mahuta, e kii ana, ‘Ko te hunga whai mana, kaaore e kiiia ana he mana too raatou, ko taa raatou, he kite mai i te mana i aana mahi, te kite mai i oona ringaringa e whakamana ana i ngaa kaupapa, ka kite mai i toona ngaakau e whakamana ana i ngaa tini kaupapa.’